Күндү доҕоттор, бар дьоммут уйгулаах, нус-хас олоҕун хааччыйар Тааттабыт улууһун олох-дьаһах коммунальнай хаһаайыстыба эйгэтин бары туруу үлэһиттэрэ, ытыктабыллаах ветераннара!
Хас сыл ахсын, кулун тутар ый үһүс өрөбүлэ биһиги олохпутугар саамай наадалаах, тыйыс айылҕалаах Сахабыт Сирин туруу үлэһит дьонуммут идэлээх күннэрэ бэлиэтэнэр. Олох-дьаһах коммунальнай хаһаайыстыба эйгэтэ биһиги Республикабыт биир саамай тыын суолталаах салаата буолар, кэнники сылларга саҥа котельнайдар тутулланнар, баар котельнайдар саҥардылланнар күнтэн-күн бар дьоммут кыһынын сылаастык, быр-бааччы олохтоох буолуута үксээн иһэрэ олус үөрдэр. Быйылгы сылга Боробулга, Чычымахха квартальнай котельнайдар тутуулара бүтэн, кэлэр кыстыктан үгүс ыалы кииннэммит ититэр ситиминэн хааччыйыахтара. Харбалаах Теплица түөлбэтигэр саҥа котельнай тутуута саҕаланыа, үгүс объектарбытыгар саҥардыы үлэлэрэ, ону сэргэ өрүмүөн үлэлэрэ ыытыллыахтара. Инникитин улууспут киинигэр ууну ыраастыыр уонна канализация уутун ыраастыыр станциялар тутуулара ыытыллыахтара, улууспут бары нэһилиэктэригэр үгүс былааннар олоххо киириэхтэрэ диэн бигэ эрэллээхпин.
Биһиги улууспутугар государство таһымнаах олох-дьаһах коммунальнай хаһаайыстыба тэрилтэтин сэргэ чааһынай тэрилтэлэр дьоммут-сэргэбит уйгулаах олоҕун мэктиэлээн үтүө суобастаахтык үлэлииллэрин үтүө тылыбынан бэлиэтиибин.
Күндү доҕоттор!
Хас биирдии үлэһит эппиэтинэстээх сыһыаныттан, эһиги үлэҕэ бэриниигититтэн тыһыынчанан улууспут олохтооҕун олоҕун уйгута, тэрилтэлэрбит үлэлэрэ быһаччы тутулуктаах. Онон хас биирдии туруу үлэһит дьоммутунан, олохторун бу сүҥкэн суолталаах эйгэҕэ анаабыт ветераннарбытынан киэн туттабын, бар дьонум аатыттан барҕа махталбын тиэрдэбин.
Хас биирдии бэйэҕитигэр чэгиэн чэбдик туругу, дьиэ кэргэҥҥитигэр иллээх-эйэлээх дьоһун олоҕу, бар дьоҥҥут барҕа махтала, үтүө тыллара эрчими, күүһү эбэ турдуннар, этэҥҥэ буолуҥ күндү коллегаларым.
Бары үтүөнү кытта норуот дьокутаата Прокопий Рахлеев.