Сыл ахсын алтынньы 7 күнүгэр «За достойный труд!» Аан дойдутааҕы күнүгэр профсоюз үлэһиттэрин сокуонунан бырааптарын уонна интэриэстэрин көмүскүүр сыаллаах араас аахсыйалар ыыталлалаар. Бу үтүө үгэс 2008 сылтан олохтонон, Аан дойду дойду үрдүнэн ыытыллар.
2024 сылга РФ Бэрэсидьиэнэ Владимир Путин Арассыыйаҕа Дьиэ кэргэн сылынан биллэрбитинэн, бу аахсыйа «Достойный труд – основа благополучия семьи!» диэн девиһинэн салайтарар.
Профсоюзтар инники күөҥҥэ турар соруктарынан буолар: дьиэ кэргэн байылыаттык олорорун, оҕолорбут инникилэрэ кэскиллээх буоларын туһугар, үлэһиттэр сөптөөх хамнастаналларын, хас биирдии үлэһит үлэтиттэн дьиэтигэр, дьиэ кэргэнигэр этэҥҥэ, доруобуйатын энчирэппэккэ кэлэрин ситиһэр сыалтан, үлэ усулуобуйата куттала суох буолуутун тэрийии, социальнай партнерствоны (үлэһит уонна салайааччылар сыһыаннара) сайыннарыы уонна дьиэ кэргэн көмүскэллээх, өйөбүллээх буоларын туһугар араас эйгэ бары үлэһиттэрин профсоюһунан хабыы кыаҕын кэҥэтии.
Профсоюзтар бу күҥҥэ дьиҥ хамнаһы (статистика этэринэн буолбатах) үрдэтиини, Арассыыйаҕа сиэрдээх, бигэ туруктаах социальнай страхование систиэмэтин олохтооһун, үлэһиттэр интэриэстэрин, ол иһигэр дьиэ кэргэни көмүскүүр туһуттан, бары үлэ биэрээччилэргэ отраслевой уонна региональнай сөбүлэҥнэр тарҕаныылара булгуччулаах буолуутун ситиһиини туруулаһар.
П.В. Борисов, Таатта улууһун профсоюзтарын координационнай Сэбиэтин бэрэссэдээтэлэ.