«Аан дойду үрдүгэр биир эрэ андаҕар тыллардаах эмчиттэр» стела аһылынна

Сэтинньи 28 күнүгэр “Доруобуйа харыстабыла” национальнай бырайыак “Доруобуйа харыстабылын бастакы сүһүөҕүн саҥардыы” эрэгийиэннээҕи бырагырааматын чэрчитинэн, Таатта улууһун киин балыыһатын саҥа таас дьиэтэ тутуллан үлэҕэ киирэр күнүгэр эмчиттэргэ аналлаах стела аһылынна.

 

Стела өр сыл үлэлээбит бэтэрээн быраастарга, салайааччыларга анаммыт. Өйдөбүнньүк бэлиэ матырыйаалын хомуйууга балыыһа түмэлигэр таһаарыылаахтык үлэлээбит Алевтина Захарова, Клара Егорова, балыыһа кинигэтин хомуйан таһаарбыт Мария Решетникова көмөлөрүнэн оҥоһулунна.

Стела аһыллыытыгар бэтэрээн быраас Раиса Петровна Нестерова «Таатта улууһун Ытык Күөлүгэр эмп тэрилтэтэ 1933 сыллаахха арыллыбыта, быйыл 90 сылын туолла. Онон сибээстээн, мэдиссиинэ үлэһиттэрин эҕэрдэлиибин. Аныгылыы көстүүлээх кэрэ бэлиэ стела турбутунан, саҥа таас поликлиника үлэҕэ киирбитинэн олус долгуйдум», — диэн санаатын үллэһиннэ.

Улуус сүрүн бырааһа Сардана Кононова: «Биһиги баҕабыт кыһыннары, сайыннары умуллубат уоттаах, дьону угуйар, аныгылыы быһыылаах-таһаалаах стела буолла, барыта табылынна», — диэн туран бар дьонугар махталын биллэрдэ.

Балыыһа үлэһиттэригэр, үрүҥ халааттаах аанньаларбытыгар анаммыт стела сайда, эбиллэ туруохтун.

Елена Слепцова.

Читайте дальше