Кулун тутар 2 күнүгэр Чөркөөххө, П.А.Ойуунускай аатынан Судаарыстыбаннас түмэлигэр чөл олоҕу, саахымат оонньуутун көҕүлүүр, саҥа сүүрээни көрдүүр, саахыматтыыр сатабылы үрдэтэр сыаллаах “СЭТТЭ” хампаанньа (ген.директор А.Д.Данилов) бирииһигэр Чөркөөххө олорор, үлэлиир улахан дьоҥҥо, үөрэнээччилэргэ биирдиилээн бастыыр иһин 2024 сыл I квартал турнира бэрт тэрээһиннээхтик буолан ааста.
Турнирга барыта 16 киһи кытынна. Ол иһиттэн 5 оскуола оҕото. Турнир саамай аҕа саастаах оонньооччута 80-с хаарыгар үктэммит А.Т.Таппыров, саамай эдэр оонньооччу 4 кылаас үөрэнээччитэ Амилия Жегусова. Маны таһынан, турнирга саахымакка нэһилиэк чиэһин элбэхтик көмүскүүр, бэтэрээн саахыматчыт Александра Ионовна Жегусова уолунаан Степанныын уонна 4 сиэнин кытта, Афанасий Собакин бииргэ төрөөбүт быраатын Мишалыын кытыннылар. Дьиэ кэргэнинэн саахымат оонньуур ситиһиини мэктиэлиирин чөркөөхтөр билэбит. Ол курдук Таппыровтар, Мосориннар, Охотиннар, Протодьяконовтар, Даниловтар дьиэ кэргэнинэн оонньоон өрөспүүбүлүкэҕэ биллэр саахыматчыттар. Саахымат мындыр уустук оонньуутунан умсугуйан, бүтүннүү ылларан, идэ оҥостон билигин да саахымат сайдыытыгар сыраларын биэрэллэр, ис сүрэхтэриттэн ыалдьаллар, турнир тэрийэн дьону көҕүлүүллэр, бары өттүттэн саахыматы өйүүллэр.
Ол курдук А.Д.Данилов бэйэтин этиитинэн, тус санаатынан “СЭТТЭ” хампаанньа бирииһигэр тэрийбит турнирыгар саахымат икки көрүҥүнэн барда. 15 мүнүүтэлээх түргэн саахымакка 1 миэстэ Дмитрий Максимов, 2-с Степан Жегусов, 3-с Александр Федоров буоллулар. Чыпчылҕан толкуйдаах, таһырҕаччы түһүүлээх 5 мүнүүтэлээх блиц оонньууга Степан Жегусов тэҥнээҕин булбакка холкутук бастакы миэстэни ылла. Киниттэн кыратык хаалан Дмитрий Максимов 2-с буолла. 3-с миэстэҕэ оонньуу хаачыстыбатынан 10-с кылаас үөрэнээччитэ Феликс Жегусов таҕыста.
Икки көрүҥ кыайыылаахтарын “СЭТТЭ” хампаанньа анал мэтээллэринэн, грамоталарынан, харчынан (1 миэстэ 15000, 2 миэстэ 10000, 3 миэстэ 5000 ск.) бириэмийэлээтэ.
Хатыһыылаах турнирга, эриэ-дэхси оонньууга М.Т.Таппыров үөрэнээччилэрэ оҕо саастарын санаан, саахымат хонуутугар киирсэн, урукку үөрүйэхтэрин уһугуннарбыттара кэрэхсэбиллээх, чөркөөхтөр билигин да буорахпыт баар эбит диэн санааҕа аҕалан үөртэ. Маны таһынан баһылык А.П.Семенов саахымат оонньоон, хотуу үөрүүтүн, хотторуу кыһыытын билэн, бэйэтинэн холобур буолан, турниры киэргэттэ, оонньууну сытыырҕатта.
Этиллибитин курдук, бу — “СЭТТЭ” хампаанньа 2024 сыл I квартал турнира буолла. Аны бу сылга 3 турниры былаанныыр. Онон, Чөркөөххө саахымат оонньуутун көҕүлүүр дьоммутун өйөөн инники буолар турнирдарга турунан дьарыктаныаҕыҥ, көхтөөхтүк кыттыаҕыҥ!
Турниры тэрийбит “СЭТТЭ” хампаанньаҕа, генеральнай директор А.Д.Даниловка, турнир ыытыытыгар көмөлөспүт Судаарыстыбаннас түмэлин үлэһиттэригэр, салайааччытыгар М.Г.Аржаковка саахыматчыттар махтаналлар.
Саахыматы ситэри сырдатар буоллахха, кулун тутар 3 күнүттэн өрөспүүбүлүкэҕэ хамаанданан саахымакка бастыыр иһин күрэхтэһии саҕаланар. Хамаандаҕа Никита Находкин, Владимир Таппыров, Дмитрий Мосорин, Айсена Васильева, Марфа Дъячковскай (Мосорина) киирдилэр. Хамаанда спонсорынан ТУТСТРОЙ тутуу хампаанньа (дир.Н.Р.Сидоров) буолла.
Саахымат оонньуутун өйүүр, сайыннарар баҕалаах дьиҥнээх патриот уолаттарбытынан Андрей Джуровиһынан, Николай Романовиһынан киэн туттабыт, ис сүрэхтэн астынабыт, махтанабыт.
Былатыан Ойуунускай сахпыт кыыма күөдьүйдүҥ, үтүө үгэс умнуллубатыҥ!
Сырытта Р.Таппырова