Кулун тутар 28 күнүгэр Саха сиригэр Гражданскай сэрии Дьоруойа, «Кыһыл Знамя» уордьан кавалера, РСФСР норуотун үөрэҕириитин туйгуна Гаврил Васильевич Егоров — Бартыһаан Дьөгүөрэп 145 үбүлүөйдээх сааһа буолан ааста.
1930-1932 сыллардаахха Хара Алдан нэһилиэгэ Уус Алдан оройуонугар киирэр этэ. Онон нэһилиэк салайааччылара Уус Алдан киинигэр Бороҕоҥҥо баран, Гаврил Васильевич олорор Тандатыгар сылдьан, хайаан да кинин көрсөллөрө, сүбэ-ама ылаллара. Ол көрсүһүүлэригэр оскуола астарар баҕа санааларын кэпсэтэллэрэ. Кинилэр кыһалҕаларын өйдөөн, Гаврил Васильевич Егоров Хара Алдаҥҥа оскуола дьиэтин туттарарга көмөлөһөр санааны ылыммыта (оччолорго кини дойдутугар Тандаҕа уонна Кэбээйи оройуонугар оскуола туттарбыта). Оскуола тутуллуор диэри Хоту Хараҕа «Бээйэ өтөҕө» диэн сиргэ Михаил Гаврильевич Старостин Бээйэ дьиэтигэр биир хоһу эбии салҕаан туттаран, 1931 сыллаахха оскуола аһыллыбыта. Оскуоланы нэһилиэк күүһүнэн «Аана өтөҕө» диэн сиргэ 1932 сыллаахха түөрт кылаастаах оскуола аһыллыбыта, оскуоланы өйөөн, туруорсан туттарбыт киһилэрин убаастаан, оскуоланы Г.В. Егоров аатынан ааттаабыттара.
Хара Алдан орто оскуолата 93 сыл Бартыһаан Дьөгүөрэп аатын сүгэн кэллэ. Оскуолабыт аатын сүгэр улуу киһибитигэр анаан, оскуолаҕа сэргэх тэрээһин ыытылынна. Ол курдук «Номох буолбут олох» уус-уран айымньыларга, ахтыыларга, докумуоннарга хаартыскаларга олоҕурбут Бартыһаан Дьөгүөрэп туһунан «Бичик» кыһата таһаарбыт кинигэ оскуола библиотекатыгар уонна оскуола музейыгар көстөр сиргэ турар. Бу кинигэҕэ Ем. Ярославскай аатынан Саха Государственнай холбоһуктаах музейыгар, Уус Алдан, Танда музейдарыгар баар баай матырыйааллар, сэдэх хаартыскалар киирбиттэр.
Г.В. Егоров туһунан Уус Алдан Танда музейыттан булуллубут элбэх матырыйааллары туһанан уонна «Номох буолбут олох» диэн кинигэнэн сирдэтэн, үөрэнээччилэргэ билиһиннэрдибит. Ол курдук тэрээһиммит Гаврил Васильевич олоҕун кэрчиктэриттэн Т.П. Сметанина билиһиннэрдэ, «Бартыһаан Дьөгүөрэби чинчийэбит» диэн оскуола библиотекара А.Г. Бочурова салайыытынан 11 кылаас үөрэнээччитэ Егор Винокуров дакылаатынан кытынна, орто сүһүөх кылаас үөрэнээччилэрэ Н. Босиков «Хабырылла Дьөгүөрэпкэ» кинигэттэн хоһоон аахтылар, И. Находкин суруйуутугар «Хабырылла Дьөгүөрэп» сценкаттан быһа тардан көрдөрдүлэр.
Саха тылын учуутала уонна дириэктэри иитэр үлэҕэ солбуйааччы О.П. Егорова хоһоону уонна сценканы үрдүк таһымҥа бэлэмнээн, оҕолор да, көрөөччүлэр да астыннылар.
Т.П. Сметанина, Хара Алдан орто оскуолатын учуутала.