Сэрии кэмнэригэр командование бойобуой сорудахтарын килбиэннээхтик толорбут, элбэх ахсааннаах буойуттар, партия уонна правительство үрдүк наҕараадаларын ылаттаабыттара. Элбэх биллибэт ааттар көстөн, Аҕа дойду сэриитин историятын көмүс буукабаларынан суруллубуттара.
Кинилэр ортолоругар, биһиги биир дойдулаахпыт, Федор Матвеевич Охлопков баар. Ф.М. Охлопковка Советскай Союз Геройун аатын иҥэрии, кыргыһыы киэҥ хонуутугар Саха сирин буойуна уһулуччулаах быһыылары оҥорбутун көрдөрөллөр.
Ити курдук, соторутааҕыта, Саха сиригэр 1919 сыллаахха төрөөбүт, Лонгинов Владимир Денисовичка ССРС Верховнай Советын Президиумун 1943 сыл алтынньы 25 күнүнээҕи ыйааҕынан Советскай Союз Геройун аата иҥэриллибитэ архив докумуоннарыттан көһүннэ.
206-с стрелковай полкатын 1-й стрелковай батальонун пулеметнай ротатын отделениетын командира, ыстаарсай сержант таб. Лонгинов 1943 сыл балаҕан ыйын 25 күнүгэр өстөөх аспыт кутаа уотун ортотунан саталлаах, сорунуулаах хорсун быһыытынан, Днепр өрүһү туоруур средствоны бэлэмнээн, станковай пулеметын илдьэ өрүһү туораабыта. Онно саталлаахтык маскировкаланан, көстүбэккэ өстөөххө чугаһаабыта, уоту аһар позицияны булан бэйэтин пулеметынан суоһарыылаах уоту аспыта. Бэйэтин пулеметын уотунан хаххалаан дивизия стрелковай подразделениелара Днепр өрүһү сүтүгэ суох туоруулларын хааччайбыта уонна онтон салгыы Днепр өрүс арҕаа биэрэгэр плацдармы былдьаан ылан, онно беҕөргөтүммүтэ.
Бу операцияҕа таб. Лонгинов бэйэтин пулеметынан уотунан 80-тан тахса өстөөх саллааттарын, офицердарын кыдыйбыта. 1943 сыл балаҕан ыйын 29 күнүгэр бэйэтин пулеметын уотунан өстөөх 60-тан тахса саллааттарын уонна офицердарын суох оҥорбута, — диэн кини хорсун быһыытын туһунан наградной лиискэ суруллубут.
Онон Саха сиригэр, биллибэккэ сылдьыбыт өссө биир Герой бу ааспыт 1965 сылга көһүннэ.
Снимокка: Советскай Союз геройа В.Д. Лонгинов