Бүгүн, тохсунньу 13 күнүгэр, Ытык Күөлбүт килбэйэр киинигэр биир саҥа тутуу — Таатта улууһун прокуратуратыгар анаммыт дьиэ үөрүүлээх аһыллыыта буолла.
Бу ааспыт сылтан Россия үрдүнэн прокуратура органнарын дьиэлэрин саҥардыы үлэтэ саҕаламмыта. Прокуратура үлэһиттэрин идэлээх күннэрин даҕаһыннаран өрөспүүбүлүкэҕэ толору хааччыллыылаах дьиэ бастакынан Таатта улууһугар үлэҕэ киирбитэ мээнэҕэ буолбатах.
2023-2024 сс. икки сыл субуруччу Тааттатааҕы прокуратура өрөспүүбүлүкэҕэ бастыҥ үлэлээҕинэн ааттанна. Бу биэс үлэһиттээх таһаарыылаахтык үлэлиир коллективка прокурор Эверстов Егор Егорович, кини солбуйааччыта, 1 кылаастаах юрист Васильев Дмитрий Александрович, прокурор көмөлөһөөччүтэ Горохова Арина Гаврильевна, сүрүннүүр специалист Калашникова Евдокия Ивановна уонна суоппар Софронов Елисей Герасимович түбүгүрэллэр.
Кинилэр үөрүүлэрин үллэстэн улуус баһылыгын э.т. Руслан Игнатьевич Захаров, улуус депутаттарын Сэбиэтин бэрэссэдээтэлэ Петр Петрович Максимов, Таатта нэһилиэгин баһылыга Егор Иннокентьевич Павлов, Тааттатааҕы ИДьО начальнига Александр Николаевич Баснаев, прокуратура ветерана Саха өрөспүүбүлүкэтин үтүөлээх юриһа Клавдия Николаевна Голикова, Чурапчыттан силиэстийэлиир комитет салайааччыта Егор Николаевич Местников истиҥ эҕэрдэлэрин эттилэр, сэмэй бэлэхтэрин туттардылар. Алгыс баһын сыалаата алгысчыт Иван Федотович Иванов, ылбаҕай ырыатын анаата Виталий Эверстов.
Улуус олоҕор сабыдыаллаах буолуохтаах саҥа дьиэ туһунан эттэххэ, хас биирдии үлэһит туһунан кабинеттаах, аныгы ирдэбилгэ сөп түбэһэр толору хааччыллыылаах, киэҥ-куоҥ, блочно-модульнай конструкциянан, типовой бырайыагынан гаражтаах тутуллубут. Хас биирдиибит сокуону тутуһан олорорун, улахан сокуону кэһии тахсыбатын, гражданнар бырааптара күөмчүлэммэтин туһугар прокуратура коллектива саҥа дьиэҕэ улуус тэрилтэлэрин кытта бииргэ ситимнээхтик күүскэ үлэлэһиэхтэрэ диэн эрэнэ хаалабыт.
А.Неустроева.