Кэскил» издательство уонна бырамыысыланнай тэрилтэлэр көҕүлээhиннэринэн көмүс хостооhунун салаатыгар анаммыт өрөспүүбүлүкэтээҕи «Я бы в промышленность пошел!» диэн ааттаах тэрээһин ыытылынна.
Бу күрэскэ Саха сирин араас улуустарыттан эдэр корреспонденнар кыттыыны ыллылар. Тынааhыннаах күрэс түмүгэр А.Е. Мординов аатынан Тааттатааҕы лиссиэй чиэhин Афоня Канаев, Эмилия Охотина, Айна Собакина көмүскээн, түмүктүүр финалга 4 хамаанда ахсааныгар киирбититтэн 2 миэстэ буолары ситистилэр.
Бырамыысыланнаска сыһыаннаах, профориентацияҕа туһуламмыт күрэс туһунан оҕолорбут санаалара:
Афоня Канаев: «Күрэскэ саамай ыарахана диэн сценарий толкуйдааhына этэ. Тоҕо диэтэххэ биhиги улууспут көмүс баайдаах сиртэн тэйиччи сытар. Толкуй бөҕө түмүгэр Харбалаахтыыр аартыкка баар кумах карьерыгар тиийэн, карьерга киирии өттүн устубуппут. Манна тырааныспарынан хааччыйбыт, көмөлөспүт учууталбытыгар Анфиса Васильевнаҕа махтанабыт».
Эмилия Охотина: «Дьэ, ол кэннэ аны хайдах көмүс хостооhунун көрдөрөбүт диэн толкуйга түһэн, «Саханефтегазсбыт» ААУо тэрилтэни баран көрүөххэ диэн санаа киирбитэ, манна олох сыыспатах эбиппит. Онно биһиэхэ геология боппуруостарыгар толору эппиэттэри биэрбиттэрэ. Бириэмэ кырыымчыгынан олох кылгас информацияны ылан укпуппут. Өссө биир өрүтүнэн ханнык профессиялары ыллахха, маннык улахан бырамыысыланнай тэрилтэҕэ үлэлиэххэ сөбүй диэҥҥэ сөптөөх хоруйдары ылбыппыт көмөлөспүтэ».
Айна Собакина: «Биһиги үлэбитигэр элбэх материал хомуллубута, матырыйаалбытын 2 мүнүүтэ иһигэр монтажтан угар уустуктардааҕа. Долгуйбуппут аҕай. Манна эмиэ хамаанданан үлэлээбиппит. Уопсайынан, медиа хайысхаҕа үлэлииргэ киһи элбэх сатабылга үөрэнэр. Манна биһиэхэ 2 сыл устата дьарыктаммыппыт улаханнык көмөлөстө. Бу биһиги биир улахан ситиһиибитинэн буолар. Холобура, мин журналистика салаатын бүтэрдэхпинэ, төһө баҕарар бырамыысыланнай тэрилтэҕэ үлэлиэхпин сөп эбит диэн түмүккэ кэллим».
Кэнэҕэски кэлэр көлүөнэбит үөрэҕи, бырамыысыланнаһы тэҥҥэ дьүөрэлээн, төрөөбүт дойдуларын сайыннарар үтүө үлэһит дьон буола үүнэллэригэр баҕарыаҕыҥ.
Ольга Корякина.