Н.Е. Мординов-Амма Аччыгыйын аатынан үөрэхтээһин холбоһуга диэн тэрилтэ 2018 сыллаахха Харбалаахтааҕы профессиональнай лиссиэй уонна орто оскуола холбоһоннор тэриллибитэ.
Бу Саха сиригэр орто анал идэни биэрэр уонна уопсай үөрэхтээһин биир кэлимсэ буолан үлэлээһиннэрин бастакы хараҥаччыта буолар. 2019 сыллаахха оччотооҕу үөрэх уонна наука министерствотын орто анал үөрэхтээһинигэр министри солбуйааччы Нюргуна Афанасьевна Соколова салалталаах үлэлиир бөлөх кэлэн, кэлэктииби кытта улахан сүбэ мунньах тэрийбитэ. Холбоһук хайдах үлэлиэн сөбүгэр сүбэ-соргу биэрбиттэрэ. Үс хайысханан арахсан, сайдыы хайдах барыан сөбүн анаарар бырайыактары толкуйдаан оҥорон, көмүскээһин тэриллибитэ.
Ити үлэлэринэн сирдэтэн холбоһук үлэтин сүрүнэ торумнаммыта. Онтон номнуо 5 сыл ааһа оҕуста. Холбоһук лиссиэй өттүнээҕи салаатыгар баһаарынньык, электромонтер, хайаны байытар үлэ машиниһа, тыа хаһаайыстыбатын маастара, тимиртэн уһанар уус идэлэригэр үөрэтэр. Баһаарынньык уонна хайаны байытар үлэ машиниһа идэлэргэ 9 кылаас кэнниттэн үөрэнэллэр. Манна киэҥ Сахабыт сирин араас улуустарыттан сыллата элбэх оҕо кэлэн үөрэнэн, идэ ылаллар.
Холбоһук директорынан былырыыҥҥыттан СӨ үөрэҕириитин туйгуна Анна Васильевна Мосоркина үлэлиир, кини кэскили көрөн, дириҥник ылсан үлэлээн эрэрэ барыбытын үөрдэр. Быйыл икки саҥа мастерскойу туруорсан ылла, ону таһынан, үөрэнэр корпуска, остолобуойга улахан өрөмүөнү ыыттарда. Киниэхэ күүс-көмө, өйөбүл буолаллар үөрэх-производство өттүгэр солбуйааччыта Ульяна Васильевна Егорова, иитэр үлэни сүрүннээччи Надежда Еримеевна Большакова.
Былырыыҥҥы үөрэх дьылыгар улахан ситиһиилэртэн быһа тардан билиһиннэрдэххэ: 2 куурус устудьуона Александр Оконешников бүтүн Арассыыйатааҕы «Путь к успеху» НПК-ҕа кыттан 1 миэстэни ылбыта, салайааччылара АБ үөрэҕириитин бочуоттаах үлэһитэ, АБ үөрэхтээһинин бочуоттаах бэтэрээнэ Галина Григорьевна Сорова, маастар Алексей Александрович Ксенофонтов. Өрөспүүбүлүкэтээҕи «Идэ маастарыстыбатын» күрэҕэр холбоһук хамаандата «Быыһыыр үлэлэр» күрэххэ 3 миэстэни ылан, кыайыы өрөгөйүн билбиттэрэ. Салайааччылара маастардар Геннадий Михайлович Тарасов, Игорь Аркадьевич Васильев уонна 9 кылаас үөрэнээччитэ Женя Сердцев иккис сылын субуруччу өрөспүүбүлүкэтээҕи «Эдэр профессионаллар» күрэххэ иккис, маҥнайгы миэстэлэри ылбыта.
Бу олус туһалаах массыына өрөмүөнүн күрэҕэр Женяны маастар Сергей Васильевич Петров бэлэмнээн кытынннарар. Студеннар араас күрэхтэргэ, ырыа, үҥкүү фестивалларыгар куруук көхтөөхтүк, ситиһиилээхтик кытталлар. Оскуола үөрэнээччилэрэ 9 кылаас кэнниттэн салгыы лицей бөлөхтөрүгэр көһөн үөрэнэн, аттестаты сэргэ идэ ылан бүтэрэр буоллулар.
Иитэр үлэ оскуоланы кытта сэргэ, тэҥҥэ барар. Оскуолабыт үөрэнээччилэрэ лицей өттүгэр куруһуоктарга дьарыктанан, идэҕэ хайысха ылаллар. Студеннар Харбалаахха баар таас чоҕу хостуур «Төлөн» ААО-ҕа быраактыкаларын бараллар, сорохтор үөрэхтэрин бүтэрдэхтэринэ, үлэлии киирэллэр. А.Б.профессиональнай үөрэҕин туйгуннара наставниктар Галина Григорьевна Сорова, Антонина Егоровна Попова, Виктория Валериановна Григорьева, Виктор Васильевич Протопопов эдэрдэргэ көмөлөрө, өйөбүллэрэ тугунан да кэмнэммэт.
Профессиональнай Харбалаахтааҕы үөрэхтээһин холбоһуга нэһилиэк олоҕор куруук көхтөөхтүк кыттан, сүрүн хамсатар күүс буолар.
Бүгүн «Орто анал үөрэх» күнүнэн студеннары, үлэһиттэри, учууталлары эҕэрдэлиибин! Сайдыыга олук уурар орто анал идэни биэрэр олус наадалаах үлэҕит кэскилэ кэҥээтин, үүнэн-сайдан истин!
СӨ үтүөлээх учуутала Валентина Семеновна Кривошапкина, Харбалаах.